Bose uko ari mirongo itatu n’umwe (31), abashinzwe Imiyoborere Myiza mu Turere n’Umujyi wa Kigali bitabiriye urugendoshuri bateguriwe n’ Ishyirahamwe ry’ Uturere n’ Umujyi wa Kigali mu Rwanda (RALGA) guhera ku itariki ya 06 kugeza ku ya 09 Gashyantare 2012. Babashije gusura Uturere twa Nyamagabe, Rulindo ndetse n’ Umujyi wa Kigali.

Icyo gikorwa cyari mu rwego rw’ umushinga w’ingendoshuri RALGA itegurira abanyamuryango bayo igamije kubongerera ubushobozi, by’umwihariko bigira ku dushya twakozwe na bagenzi babo. Uwo mushinga uterwa inkunga n’ urwego rw’ igihugu cy’ Ububirigi rushinzwe ubutwererane mu bya tekinike (Belgian Technical Cooperation) rubinyujije ku Kigo cy’ Igihugu gishinzwe kongerera abakozi ubushobozi (Public Service Capacity Building Secretariat). Abari muri urwo rugendoshuri bakaba bahamya ko barwigiyemo byinshi.

Ibanga ryo kwesa imihigo, ubufatanye n’ abaturage,…

Imwe mu mpamvu yatumye Uturere twa Nyamagabe na Rulindo dutoranywa kugira ngo dukorerwemo uru rugendoshuri, ni uko tumaze igihe tuza mu myanya ya mbere mu kwesa imihigo. Basura utwo Turere, abashinzwe Imiyoborere Myiza bagaragarijwe impamvu zituma ibyo bigerwaho. Kimwe mu by’ingenzi bagaragarijwe kikaba ari uko utwo Turere twabashije kwirinda uguhindagurika kwa hato na hato kw’inzego, haba muri Komite Nyobozi, Inama Njyanama ndetse n’abakozi b’Akarere. Nkuko byemezwa n’abayobozi n’abakozi bo mu Turere twasuwe, ibi byabafashije kwirinda igihombo cyo gutakaza abakozi baba bahuguwe nyamara bwacya bakagenda, bigatuma ibikorwa byateganyijwe bibura abishyira mu bikorwa ngo Akarere kese Imihigo kihaye.

Mu Karere ka Rulindo by’umwihariko, Mayor Justus Kangwagye, Umuyobozi w’ako Karere akaba ari nawe uyobora RALGA muri iki gihe, yasobanuriye abari mu rugendoshuri ukuntu ubufatanye bw’ubuyobozi n’abaturage bwatumye ibibazo bahoranye aribyo bakomoraho ibisubizo bafite ubu. Abari mu rugendoshuri bagaragarijwe ukuntu abaturage bagize uruhare rugaragara mu kwiyubakira amashuri n’amavuriro bari barabuze ku ngoma zo hambere. Ibyo bikaba byarashobotse kubera ko ubuyobozi bwabagejejeho gahunda nziza bubafitiye, kandi bukanabaha umurongo usobanutse wo gukoreramo. Ubufatanye nk’ubwo na none bwagaragaye mu duce dutandukanye tw’ Umujyi wa Kigali. Abari mu rugendoshuro babashije kwibonera ukuntu abaturage bo mu Midugudu itandukanye yo mu Murenge wa Kinyinya biyemeje kwiyubakira ibiro ikoreramo, bakabishyiramo ibikoresho by’ ibanze, ndetse bakanahemba Abakuru b’ Imidugudu. Abafashe iyambere muri iyo gahunda akaba ari abaturage bo mu Mirenge ya Kadobogo na Kabuhunde ya mbere.

Barashima RALGA kuko ibahuza

Uretse kuba barigiye byinshi aho basuye, abashinzwe Imiyoborere Myiza mu Turere n’Umujyi wa Kigali barahamya ko, kimwe na bagenzi babo bashinzwe indi mirimo, guhuzwa mu ngendoshuri ndetse no mu buryo bw’ikoranabuhanga mu itumanaho bibafasha gukomeza kungurana ibitekerezo no guhana amakuru ku buryo bwihuse kandi buhendutse. Bakaba barifuje ko ingendoshuri nk’izi zazakorerwa no mu tundi Turere twakataje muri gahunda zitandukanye bakwigiraho.

Abari mu rugendoshuri bahawe inama zibubaka

Mu kiganiro yahaye abo bayobozi, Umunyamabanga Mukuru wa RALGA, Bwana Théogène Karake, yibanze ku nshingano zabo, abagaragariza ko aribo mutima w’ Akarere kuko ahatari imiyoborere myiza bikomeye kuhabona iterambere. Yongeye kubasaba guhora bihugura kuko inshingano zabo ziremereye. Yabijeje ko RALGA izakomeza kubakorera ubuvugizi mu nzego za Leta, kandi ko iteganya kuzashyiraho ikigo kizajya gihugura ku buryo buhoraho abayobozi n’abakozi mu Nzego z’ Ibanze (Local Government Institute) hagamijwe kubongerera ubushobozi.

Bwana Ruburika Antoine, Umuyobozi muri Rwanda Governance Board (RGB) nawe yatanze ikiganiro agaragariza abari mu rugendoshuri ko aribo jisho rya Leta mu gutanga serivise nziza mu Karere. Yaboneyeho kubibutsa ko bafite inshingano yo gukangurira inzego bakorana nazo ku Karere ko imiyoborere myiza itangirana no kwakira neza abaturage, kubatega amatwi no gukemura ibibazo byabo bidatinze. Ibyo bigakorwa kuva ku rwego rw’ Umudugudu, Akagari, Umurenge, ndetse bikazamuka bikagera no ku Karere. Yabasabye ko amahame y’ imiyoborere myiza aribo ba mbere bakwiye kuba bayagaragaza, bityo bikoroha mu kuyatoza abandi bayobozi.

Participants to the study tour