Kuva ku cyumweru tariki ya 29 Mutarama kugeza ku itariki ya 03 Gashyantare 2012, abayobozi b’Ishami ry’ Imari mu Turere n’ Umujyi wa Kigali bakoreye urugendoshuri mu Turere twa Nyamasheke, Nyarugenge na Ngoma. Bari bajyanywe muri utwo Turere no kwigira ku dushya tugaragarayo kugirango bavanemo amasomo bashobora gukoresha iwabo.

Nk’uko bitangazwa na Bwana Enock Bwatete, Umuyobozi Ushinzwe Imari n’Ubutegetsi mu Ishyirahamwe ry’ Uturere n’ Umujyi wa Kigali mu Rwanda (RALGA), uru rugendoshuri rwari mu rwego rw’ umushinga wa RALGA wo kongerera ubushobozi abanyamuryango bayo. Uwo mushinga ukaba uterwa inkunga urwego rw’ igihugu cy’ Ububirigi rushinzwe ubutwererane mu bya tekinike (BTC) rubinyujije mu Kigo cy’Igihugu gishinzwe kongerera abakozi ubushobozi mu Rwanda (PSCBS).

Buri Karere kasuwe gafite umwihariko

Mu Karere ka Nyamasheke, abari mu rugendoshuri basobanuriwe uko imyakirire y’imisoro n’amahoro y’Akarere ikorwa hifashishijwe ba Rwiyemezamirimo, Ubuyobozi bw’ ako Karere bukaba bwarerekanye uburyo byazamuye imari binjinza. Mu Karere ka Nyarugenge, abayobozi bashinzwe imari mu Turere basobanuriwe imicungire y’abasora hakoreshejwe ikoranabuhanga hifashishijwe “software” yitwa “DISTAX” ndetse banasobanurirwa n’imikorere yayo. Naho mu Karere ka Ngoma, abari mu rugendoshuri basobanuriwe imisoreshereze ikoresheje abakirizi b’imisoro bakorera kuri kontaro kandi bashyizwe mu mu byiciro (zones).

Muri rusange, abari mu rugendoshuri bashimye uruhare Komite Nyobozi z’Uturere twasuwe zigira mu bukangurambaga no gukurikirana iyinjizwa ry’imisoro n’amahoro, bakaba barifuje ko byabera urugero rwiza utundi Turere twose.

Abari mu rugendoshuri baganiriye n’abayobozi batandukanye

Muri uru rugendoshuri kandi aboyobozi b’imari mu Turere n’Umujyi babonye umwanya ko kuganira n’ abayobozi mu nzego zitandukanye. Umunyamabanga Mukuru wa RALGA, Bwana Théogène Karake, akaba yarabagiriye inama yo kugira umuco wo kumenya kugabana imirimo (delegating) hagati yabo n’abo bafatanije imirimo mu Karere, kugirango babashe gusohoza inshingano zabo neza. Yabakanguriye kandi gutoza akazi abo bakorana kugira ngo igihe bo badahari akazi gakomeze gukorwa neza. Ikindi yabasabye ni uko mu gihe bakiri mu kazi bakwiye kugira iby’ akarusho bakora abandi bazajya babibukiraho n’igihe bazaba batagikora mu Karere.

Abitabiriye urwo rugendoshuri banagejejweho umushinga w’iteka rya Perezida wa Repubulika rivugurura kandi ryuzuza ibipimo by’amahoro yakirwa n’Inzego z’Ibanze, maze bawutangaho ibitekerezo. Intumwa za Ministeri y’ Imari n’ Igenamigambi zanabasobanuriye kandi itegeko rishya ry’imisoro yeguriwe Uturere n’Umujyi wa Kigali bararyishimira kandi bagaragaza ahakwiye kuzasobanurwa neza mu mateka arishyira mu bikorwa.

Mu isozwa ry’ urugendoshuri, Bwana Christophe Nsengiyaremye wari umushyitsi Mukuru akaba yari n’ intumwa ya Ministeri y’ Imari n’ Igenamigambi, yabashishikarije guharanira gutunganya neza akazi kabo. Yongeye kubakangurira gushyira mu bikorwa itegeko rishya rigena inkomoko n’ imikoreshereze y’ umutungo by’ Akarere , bashyira imbaraga mu kurikangurira abaturage ngo babashe kuryumva neza no kurikurikiza.